ارشادات هامه جدا لركوب واستخدام الدراجات كوسيلة مواصلات - موقع سؤال وجواب لتكنولوجيا المعلومات والسيارات

اعلان

أحدث الموضوعات

ارشادات هامه جدا لركوب واستخدام الدراجات كوسيلة مواصلات



مع انتشار استخدام العجل فى مختلف المحافظات والاماكن المختلفه ولجميع الأعمار، بقت مسألة وقت إن الشباب يبدأوا ينوعوا استخداماتهم للعجل ما بين كونها وسيلة مواصلات والسفر أو وسيلة للترفيه والفسح أو وسيلة لإنقاص الوزن وحرق الدهون أو كرياضة ليها مستقبل واعد في مصر إن شاء الله.

ركوب العجلة هيفرق كتير في حياة الناس خاصة الشباب اللي كانت حياتهم كلها رياضة وانقطعوا عنها لظروف الدراسة أو الشغل، العجلة هترجع لياقتك البدنية. وجود ناس زيك في الشارع هيفرض وجودكم في الشارع وهيعزز أمنكم وثقتكم في نفسكم، بل وممكن تفرض على المدى القريب أو البعيد على التخطيط في البلد إنه يوفر وسائل أمان لينا في الشوارع كحارات عجل أو نظام مرور لينا.

ركوب العجلة هيفرق مع الناس اللي دايمًا بتتهددهم مشاكل الشيخوخة المبكرة من قعدة المكاتب اللي متفرقش كتير عن قعدة العربيات في عز الزحمة كل يوم مرتين في مواعيد الموظفين. ركوب العجلة هيفرق مع الناس اللي حابة توفر فلوس المواصلات الشخصية أو العامة اللي كل مدى بتزيد ولسه كمان هتزيد.

ركوب العجلة ببساطة لياقة ورياضة وتعارف مع ناس من نفس عقليتك بدل ضياع الوقت في المواصلات وحرق الأعصاب اللي الواحد “كان” بيشوفوا في الإشارات حتى والله في غير مواعيد الموظفين.
يبقى وجود إرشادات مهمة تعين الشباب على استخدام العجل باستخداماته المتعددة بصورة صحيحة وسليمة تخلي من العجل جزء جميل من حياتهم ويخفف من زحمة الحياة اللي الواحد بيغرق فيها.

النهارده إن شاء الله هنتكلم عن الترتيبات الخاصة بكون العجلة وسيلة مواصلات من وإلى الشغل.

- الترتيبات الخاصة بالعجلة :
 ليه تشيل على ضهرك، لما ممكن تركب حامل؟


أول مشكلة دايمًا بتقابلنا هي الشنط والأحمال اللي بنبقى شايلنها واحنا رايحين الشغل. كتير مننا بيروح الشغل بـLaptop أو على الأقل بورق ومذكرات أو بعدد أو أدوات ثقيلة. أسوأ السيناريوهات إنك تشيل شنطة كبيرة على ظهرك وتمشي بيها في الشارع لأسباب كثيرة؛ هتشغلك وهتخل بتوازنك على العجلة بشكل كبير وهتعرقك جامد والأهم إن الموضوع متعب لفقرات الظهر وممكن لا قدر يبقى ليه أضرار صحية كثير لمدى طويل. في بعض الأحيان هتضطر تشيل على ضهرك لكن دايمًا خليه أخر خيار قدامك وبالمعقول. طيب ايه الحل؟ الحل ببساطة هو تركيب حامل Pannier خلفي أو أمامي للعجلة يشيل عنك أي حمل أو تقدر ببساطة تربط فيه أي أدوات هتاخدها معاك في الشغل.وفي برضه شنط كبيرة بتتعلق على الماسورة العلوية Top Tube. وتاخد بالك إن مش كل العجل هتلاقي فيه مكان للـMounts بتاعت الحامل بالذات الأمامي. أماكن الحامل الخلفي موجودة كتير حتى في العجل الـEndurance Road 


اتأكد من عدة كل مشوار!
الطريق للشغل زيه زي أي مشوار محتاج عدة لتغيير الداخلي تأمن بيها طريقك رايح جاي. لازم يكون معاك على العجلة عدة لحام، وداخلي زيادة على الأقل، ومنفاخ صغير أو كبير لو هتركبه على العجلة، ولافيهات Tire Levers، وزرجينة جنزير Chain Tool أو Power Link.


-الرفرف! وما أدراك ما الرفرف!
الرفرف بالنسبة للناس اللي بتمشي في شوارع مصر المحروسة ضروري جدًا لا سيما في أيام الشتاء والمطرة. وقتها ركوب العجلة في المية والطين لعنة بمعنى الكلمة وهتضطر تغير هدومك بعد أقصر مشوار تعمله بالعجلة. ناس كتيرة متعرفش إن العجل الـRoad بأنواعه ممكن تركب عليه رفارف أو على الأقل إنها محتاجة Mounts معينة على العجل. الموضوع سهل وبسيط وفكهم وتركيبهم بأنواعهم لا يستغرق أكثر من دقيقتين وفي منهم في مصر بالفعل وعند أكثر من محل. والأهم إن شكلهم جميل وهيساعدوك تنزل بالعجلة في كل الظروف للشغل أو لأي استخدام تاني للعجلة. بدل الرفرف في بدائل تانية أسهل زي الـAss Saver والـMud Guards. بس دول مش بالضرورة يركبوا في كل أنواع الكراسي والعجل.


 - البس خوذتك لو شايف راسك تستاهل  :
طريقك للشغل لا بد هيخليك تمشي في نفس الشوارع اللي باقي الناس رايحين فيها لشغلهم برضه. نفس الشوارع الزحمة اللي مليانة من خيرات ربنا؛ عربيات وموتوسيكلات وأتوبيسات وتاكسيات. وعشان كده لازم على قد ما تقدر تأمن نفسك، ولا أهم من الخوذة تأمن بيها نفسك في الشارع. الخوذ عامةً أنواع، وفي شركات كتير بتعمل خوذ مخصوص للاستعمال داخل المدن وبأسعار مناسبة لكافة الشرائح السعرية. وفي ناس هتجيب خوذ المبتدئين بتاعت العجل الجبلي وتستعملها في الشارع. أيًا فيهم يريحك استعمله طالما مش هيعرقك وهيحافظ على تهوية رأسك وفي نفس الوقت مش هتبقى ثقيلة على راسك وتسببلك ألم في الرقبة بعد فترة قصيرة من لبسها.


- البس نظارة شمس عشان تحمي عينك :
الأغلبية العظمى من الناس بيتحركوا من بيتهم الصبح للشغل – للناس اللي شغلها الصبح – في حدود الساعة 7 أو قبلها بشوية أو بعدها بشوية. وأغلبنا برضه بيرجع في حدود الساعة 4 أو 5 العصر. كل الوقت ده الشمس بتاكل في دماغنا في الشارع والأشعة الضارة بتأثر سلبًا على عينينا. استعمالك نظارة شمسية ضرورة لأي واحد بيركب عجل في التوقيت ده. وبالليل هتستعمل نظارة بعدسات شفافة أو Anti Glare عشان تقلل من سطوع مصادر النوع المحيطة بيك وكذلك تحمي عينك من الهوا والأتربة اللي في الشارع. وفي كتير من النظارات الرياضية دي صالحة للناس اللي بيلبسوا نظارات نظر سواء نظارات مشي أو قراءة.


 - تقدر تركب مراية..؟
بعض شركات اكسسوارات الدراجات بتصنع النهارده مرايات مخصوصة للعجل، بتتركب عادة في جادون العجلة عشان تقدر تشوف فيه المنطقة اللي وراك يمين وشمال. بالنسبة للمرايات اللي بتتركب في الخوذة نفسها، فكتير من الشركات اللي بتنتج خوذ بتنصح بعدم استعمالها لخطورة وجودها جنب الوجه والرأس في حالة أي حادثة لا قدر الله. المرايات دي أكيد هتوفرلك إحساس بالأمان والثقة وهتكفيك حوادث كتير ناتجة عن عدم رؤيتك للمنطقة اللي وراك واللي ممكن يشغلها من عربيات أو حتى عجل. فكرة تركيب مرايات في العجلة فكرة جديدة ويمكن ناس كتيرة متحبهاش عشان شكلها مش هيبقى مثالي على عجلهم، بس إذا كانت المسألة تتعلق بالأمن وطريقك فعلًا محتاج حاجة زي دي فايه المانع؟ جرب وهتشوف ناس قد ايه الناس هتعمل زيك لما تقتنع بفايدتها!


- أمن عجلتك قبل ما تسيبها واختار مكان آمن للركنة :
مشكلة كبيرة دلوقتي في مصر موضوع سرقة العجل ده. للأسف مع انتشار العجل في مصر، ناس كتير بدأت تعرف أسعار العجل وبالتالي ولاد الحلال بقوا بيستهدفوا العجل كونه سلعة ليها سعرها وفي نفس الوقت عليها طلب. كل ده يخلي ركنة العجلة في مكان آمن مسألة في منتهى الأهمية وتستاهل الواحد ياخدلها كافة الاحتياطات. فأسلم حل إنك دايمًا تبقى على استعداد إنك تشيل كل اكسسوارات العجلة في شنطة معاك لو احتجت تسيب العجلة في أي مكان بعيد عن نظرك، وتقفل العجلة كويس لما تسيبها. أنواع الأقفال كتير وطرق قفلهم كتير، بس خلي بالك من وزنهم لإنك بطبيعة الحال هتبقى ماشي بيهم إما على العجلة أو في شنطتك على ظهرك. فقدر لكل قفل مميزاته وعيوبه بالنسبة لك. وكذلك اركن العجلة في حتة ظاهرة وواضحة لإن ولاد الحلال إياهم مش هيجرؤوا يقربولها، لكن لو خبتها وقُدر إن حد شافها وقتها هياخد وقته في فك القفل والتصرف زي ما يحب في العجلة، لا سيما وإن كل الأقفال مش أكثر من حل مؤقت لحفظ العجل في الأماكن العامة.

- الكشاف والاضاءه :
ركوب العجلة بالليل متعة في حد ذاتها. الجو بيبقى مناسب والشوارع في وسط الأسبوع بتبقى فاضية نسبيًا وبيبقى وقت مثالي للناس إنها تركب العجل. ومفيش أي مشكلة إنك تاخدلك لفة على سبيل الفسحة بعد الشغل برضه  بس المشكلة الوحيدة بالليل بالنسبة للعجل هي إما إن العربيات مش بتشوفنا وده من الأسباب الرئيسية في حوادث العجل، أو إن الراكب نفسه مش شايف معالم الطريق قدامه بوضوح فيقع لا قدر الله في حفرة أو ميفاديش مكان بلاعة في الشارع وما شابه. فبالتالي من المهم جدًا إن الواحد يمشي بكشاف أمامي عشان ينور لنفسه وفي نفس الوقت العربيات اللي جاية من الاتجاه التاني هيشوفوك بوضوح، وكذلك كشاف خلفي أحمر عشان العربيات اللي حواليا تشوفك برضه. العواكس برضه كويسة وإن كانت أكيد مش هتغني عن الكشاف الأمامي.


-  حسس الناس بوجودك :
طبعًا كلنا عارفين أيام الشتاء الصبح لما الناس بتنزل من بيتها نايمة ودفيانة في العربيات جوا الجواكت، سرينة صغيرة تتركب على العجلة تصحي الناس النايمة اللي في العربيات واللي واقفين مستنيين أوتوبيس الشغل .

 

- اختار كرسي مناسب ومتتكسفش من شكله  :
اختيار كرسي العجلة المناسب دايمًا عملية صعبة وبتكلف وقت طويل – وفي بعض الأحوال – فلوس كتير كمان. بصفة عامة كرسي العجلة اللي هتروح بيها الشغل يفترض أولًا مقاسك وبعدين يكون كرسي طري وتبطينه مناسب لمسافات القصيرة نسبيًا اللي هتعملها من البيت للشغل ومن الشغل للبيت. الكراسي الـGel والـGel Covers النهارده موجودة في المحلات المصرية وبكثرة وبتنوع كبير في الأسعار والأنواع.

 

- اختار كاوتش خارجي يناسبك ويناسب طريقك :
اختيار كاوتش العجلة الخارجي برضه مهم، لإن زي ما الكاوتش الرفيع بيوفرلك سرعة عالية بعزم أقل على البدال وبالتالي هتعرق أقل، الكاوتش التخين مريح أكثر وفرصة إنك تلاقي فيه طبقة مقاومة للأخرام كبيرة. أكيد محدش يحب إنه يقف متأخر وهو لابس هدوم الشغل ويغير داخلي. ومتنساش تحط في اعتبارك طبيعة الأرض اللي هتمشي عليها بالعجلة من البيت للشغل ودايمًا خلي الأمان – مقابل السرعة – أولويتك الأولى.

  -ضبط كمية الشحم في العجلة :
قلل كمية الشحم اللي بتستخدمها على الجنزير على قد ما تقدر خاصة لو عندك عجلة مخصوصة لمشوار الشغل أو لو مبتستعملش العجلة غير في مشوار الشغل. أي تصليحات هتضطر تعملها في الطريق من أو إلى الشغل هتبهدلك جامد لو مشحم العجلة زيادة، وكتير مننا للأسف بيحط كمية شحم زيادة في العجلة على سبيل الاحتياط في حين إنه مضر للعجلة زي الشحم القليل تمام.


. لازم تتأكد وانت بتشتري عجلة جديدة إذا كانت تنفع لمشوار الشغل ولا لا :
خلي بالك إن في كتير من النصايح والإرشادات اللي فوق دي مش هتقدر تعملها في كل أنواع العجل، خاصة الرفارف والحوامل الأمامية أو الخلفية. وده لإن مش كل العجل في الحقيقة يصلح يكون وسيلة مواصلات في الشوارع بتاعتنا أو في أي شوارع بالمرة.
اشتري نفسك بكام دقيقة بالليل بدل ما تعطل نفسك الصبح دايمًا اتأكد من العجلة وضغط الهواء وشحم وحالة الجنزير كل ليلة قبل ما تنزل بعدها الصبح. ده هيخلي عندك وقت تصلح أي مشكلة صغيرة بدل ما تكلفك وقت مهم وتعطلك قبل الشغل الصبح.


- ضبط العجلة عليك، متضبطش نفسك على العجلة ! :
اجراء بعض التغييرات البسيطة في وضعية ركوبك على العجلة أو عمل ما يسمى بـComfort Fit هيخلي ركوب العجلة سهل ومريح؛ لإننا أولًا وأخيرًا الأهم بالنسبة لعجلة بالاستخدام ده مش أكثر إننا نروح الشغل جاهزين لبدء يوم جديد بكامل لياقتنا بدنيًا وذهنيًا.



- الترتيبات الخاصة بالراكب :

 متجريش بالعجلة :
الفكرة في إننا مش بس مش بندور على السرعة في عجلة بالاستخدام ده، وإن السرعة هتقلل نسبيًا احساسك بالأمان وسط زحمة الموظفين الصبح، الفكرة بالأساس إن الجري بالعجلة هيعرقك جامد وهيستنفذ طاقتك اللي المفروض توفرها للشغل. استخدامك للعجلة كوسيلة مواصلات بتضمنلك إنك تبدأ يومك في الشغل بانتعاش ونشاط بديل المنبهات اللي الناس بتشربها كل يوم الصبح عشان تدخل في جو الشغل.
. اختار طريقك صح :
دايمًا هتلاقي أكثر من طريقة وأكثر من سكة تقدر تروح بيهم الشغل، بيتفاضلوا بينهم وبين بعضهم في الطول ودرجة الأمان على الطريق. دايمًا اختار لنفسك أعلى الطرق دي كلها أمانًا. أمانك على الطريق هو الأولوية الأولى لأي وسيلة مواصلات سواء العجل أو غيره. أمانك في الطريق هيعتمد على الوضع الأمني في الطريق ده وتقبل الناس لفكرة العجل، ومدى سلامة الطريق من الحفر والنقر والبلاعات والحاجات اللي العجلاتية بس عارفينها في الطريق، ومدى قابلية إنك تلاقي مساعدة ليك على الطريق من أكل أو شرب أو حتى عدة لتصليح أي عطل طارئ في العجلة، ويكون فاضي نسبيًا عن باقي الطرق التانية. الطريق اللي تتوافر فيه الشروط دي هي الآمن ليك حتى ولو كان أطول شوية. افتكر إن أقصر طريق بالعربية مش بالضرورة أقصر طريق بالعجلة، فتاني حاجة تراعيها في طريقك المطالع والمنازل في كل طريق. صعب تروح الشغل في المنزل وتروح كمان في منزل، خليه منزل وانت رايح واطلع على مهلك وانت مروح البيت
. خليك دايمًا على دراية بكل شيء حواليك :
ناس كتير بيحطوا السماعات في ودنهم الصبح وهما وهما نازلين الشغل وده للأسف بيسبب خطر كبير على حياتهم لعدة أسباب؛ أولها إن كتير من السماعات بتحجب كل الأصوات المحيطة بالراكب وبالتالي بتقلل من درجة درايته بالدنيا حواليه وده بيعرض للخطر وسط العربيات أو حتى المشاه وغيرها في الشارع. السبب الثاني إنك ممكن تفقد تركيزك مع اللي بتسمعه وتسرح وانت سايق العجلة وده برضه هيقلل من تركيزك على العجلة. بعض السماعات اللي بتبقى بسلك ممكن تشكل مشكلة كبيرة لو شبكت في أي حاجة من هدومك أو مكونات العجلة، هتبقى مسألة صعبة جدًا إنك تركز على الطريقة لو السماعات على سبيل المثال وقعت من ودانك أو شبكت في الجادون
اقضى على العرق :
حركة ظريفة عشان نقلل من موضوع العرق اللي بنعاني منه كلنا هو إنك تقلل من سرعتك ومن العزم اللي بتبذله على البدال في آخر كام دقيقة في مشوارك. ده هيضبط معدل التنفس عندك ويديك فرصة تاخد نفسك ويقلل بشكل كبير من العرق اللي ممكن يستمر معاك لحد ما تدخل الشغل لو فضلت تجري من البيت للشغل
اهتم بمظهرك في الشغل :
دايمًا اهتم بمظهرك في الشغل لإن ده أكيد هينفعك في حياتك العملية وهيشجع غيرك إنه يعمل زيك ويجرب يروح شغله بعجلة. بسهولة تقدر تقلل مش مشاكل العرق لو استخدمت مناديل مبللة ومعطرة عشان تمسح بيها عرقك ، أو غسول للوجه عشان عوادم العربيات والسواد اللي بيبقى في وش الواحد بمجرد ما يعتب برا البيت، وكمان فرشة شعر عشان أثر الخوذة في شعرك والهوا، وأخيرًا تقدر تسيب Perfume أو Deodorant في الشغل للحالات القصوى. الموضوع ممكن تحس إنه كتير، بس مع الوقت هتتعود على الموضوع وهتلاقي عدتك الخاصة اللي تخليك بكامل جاهزيتك في الشغل وبأفضل مظهر. بعض الناس ظروف شغلهم ممكن تسمح بإنهم يغيروا هدومهم اللي يقدروا يسبوها في الشغل أو حتى إنهم ياخدوا حمام سريع في الشغل أول ما يوصلوا. ده مهم جدًا لتلافي مشكلة العرق بشكل كلي مع الخطوة رقم 4 مشكلة العرق هتبقى بأقل قدر ممكن
تقدر تركب بدال Clipless :
في كتير من البدالات النهارده من الشركات بتعمل بدالات هجين من وجهين؛ وجه Clipless والناحية التانية مسطح عادي. ده هيخلي البدال يوفرلك مرونة في استخدامك للعجلة بأي جزمة. وفي نفس الوقت هتقدر تركب العجلة بالوش الـClipless بجزمة عادية تقدر تمشي بيها في الشارع وتقعد بيها في الشغل.

- اربط البنطلون :
مش هقدر أقولك كمية البنطلونات اللي عندي في الدولاب المقطوعة من أخر حتة في الرجلين قد ايه، كل ده عشان حضرتي مكسل أربط البنطلون بأي حاجة تمنع إن طرف البنطلون يشبك في الكرانك وبالتالي يقطع البنطلون.تقدر اعمل انت الـBand Strap دي بنفسك بألوان فلوروسينية عشان تظهر الضوء بالليل أو تشتريها زي ما هي في المحلات.
 

- التمارين :
لو أعتمدت العجلة كوسيلة مواصلات أساسية كل يوم الشغل هتلاحظ تحسن كبير في لياقتك البدنية وصحتك بشكل عام. لكن النقطة اللي بينساها ناس كتير قبل ما يركبوا العجل هي تمارين الاستطالات اللي ممكن توفر عليك أي ألم تحسه على العجلة أو أي إصابة مؤلمة لا قدر الله. التمارين دي بسيطة جدًا ومبتاخدش أكثر من 10 دقائق لو اتعملت صح وهتوفر عليك التعب اللي هتحسه في أول فترة استخدامك. تمارين الاستطالات بتاعت العجل وإن كانت مختلفة بعض الشيء عن تمارين رياضات تانية لكن تقدر تخلي أي حد معاك في البيت يشجعك ويعملها معاك الصبح قبل ما تنزل بالعجلة.

 

- ضبط أكلك :
أي رياضي بشكل عام يلزمه إنه ياكل أكل صحي ومناسب للأنشطة اللي بيمارسها. وجبة الفطار وجبة أساسية ومهمة جدًا في حياتنا وللأسف ناس كتير مش بتديها حقها. ولو مننا حد جرب يروح مسافة طويلة نسبيًا بالعجلة من غير ما ياكل، أكيد مش هيحب يكررها تاني، بتبقى عامل زي العربية اللي بنزينها خلص! فقبل ما تنزل كل فطار خفيف، بس يكون فيه قيمة غذائية عالية وكذلك لو هتتغدى في الشغل كل أكل خفيف وصحي عشان تقدر تروح البيت بسهولة وبنفس انتعاش مشوار الصبح. محدش أبدًا يحب يروح الشغل الصبح بيموت من الجوع ويفضل لحد آخر ساعة في الشغل تعبان ومش فايق ولا يحب إنه يتغدى غداء ثقيل أو ميتغداش خالص ويروح البيت متدغدغ ودايخ.


- اختار شنطة ظهرك بعناية كآخر الحلول :
لو اضطرتك الظروف لاستخدام شنطة ظهر – بعد صعوبة تركيب الحوامل لأي سبب – تقدر تستعمل شنط الظهر الخاصة بركاب الدراجات. بتبقى أخف وزنًا وبالتالي تقلل من الحمل على ظهرك، ومصنوعة من أنسجة تسمح بمرور الهواء عشان تقلل من العرق، وكمان بيبقى فيها جيوب خاصة لعدد العجل والداخلي وباقي عدة المشاوير. بعض الشنط بتحمي ظهرك من العرق بأكثر من طريقة؛ زي وجود طبقة من النسيج المنفذ للهواء بيتنفخ عشان يشكل فراغ بين الشنطة وبين منتصف ظهرك فيسمح بالتهوية المناسبة لظهرك، أو يكون فيها قطعتين معدنيتين بشكل مقوس من الجنبين عشان برضه يعملوا نفس الفراغ بينك وبين الشنطة ويقلل من الإحساس بالحمل على ظهرك. وفي نفس الوقت في كتير من الشنط دي هتقدر تعلقها على الحامل وانت راكب ولما توصل الشغل تشيلها على ظهرك عادي، وكتير بيبقى فيهم مكان للخوذ وللعدة والزمزميات مخصوص. ويفضل لو شايل Laptop وانت ماشي تخليه في الشنطة ومتحطوش بشكل مباشر على الحامل عشان ميتأثرش.

  - رتب نفسك :
دايمًا كنت أنزل من البيت رايح الشغل وألاقي نفسي ناسي حاجات من عدد العجل أو – أسوأ – حاجة من حاجات الشغل. اعمل لنفسك كل يوم Check List لعدة العجلة وعدة الشغل واتأكد منها في الليلة اللي قبلها وانت بتأكد على العجلة. ولو عملت في شنطتك أو على عجلتك مكان لكل حاجة من حاجات العجل، هتلاقي نفسك بسهولة بتفتكر الحاجات اللي ناقصاك بمجرد النظر للعجلة

وأخيرًا، من أهم الحاجات اللي هتعزز أمنك وثقتك بنفسك هي ببساطة انتشار استخدام المصريين للعجل كنمط ممتاز للمواصلات بالذات لو المسافات صغيرة ما بين 5 – لـ10 كيلو على سبيل المثال. كتير من الناس مش محتاجين أكثر من زقة بسيطة وتجربة فعلية قدامهم عشان ينضموا لغيرهم من الناس اللي حياتهم اتحسنت بعد ركوب العجل كمواصلات أو غيرها نتمنى لكم قيادة ممتعه .

...................................................
.
- الموقع الاصلى للمقال موقع العجله  .

...................................................

نتمنى لكم دوام الصحه والعافيه 
..............................................

- لاتنسى الاشتراك فى القائمه البريديه من اسفل الموقع ليصلك كل جديد وزيارة صفحاتنا على مواقع التواصل الاجتماعى والاشتراك فى قناتنا على يوتيوب وتفعيل جرس التنبيهات ليصلك المزيد ... 
.............................................




ليست هناك تعليقات

اترك تعليقك وشارك المعلومه لتعم الفائده وشكرا لمرورك الكريم ....