القائمة الرئيسية

الصفحات

احدث الاخبار

أبو رجل مسلوخه وأمنا الغوله والمساليخ الصغيرين قصة كل جيل التى لم يقتلها الزمن


قصة أبو رجل مسلوخه اللى مقتلهاش الزمن هيا عباره عن اسلوب تربوى اساسى فى مجتمعنا المصرى وهى عباره عن حكايه خرافيه الهدف منها تربية الابناء والزامهم بالانتهاء من واجباتهم المدرسيه او انهم يسمعوا كلام الاب والام زى انهم يروحوا يناموا مثلا . 

وقصص تخويف الاطفال دى فى الاصل قصص ملهاش اى وجود فى الحقيقه ولا ليها اى اصل ولكن فضلت فى عقولنا لحد ماكبرنا واكتشفنا ان الامر كان مجرد خدعه علشان ننام بدرى والوقتى هنعرف مع بعض ايه هى حقيقة قصة ابو رجل مسلوخه ؟؟ 

- أبو رجل مسلوخه : 

يحكى ان كان فيه رجل مشوه وكانت رجليه الشمال مسلوخه بشكل تام . اما بالنسبه لرجليه اليمين فكان نصها مسلوخ وكان الراجل البشع المشوه ده بيجى علشان يخوف الاطفال الصغيرين او ياخدهم معاه او يعاقبهم بالضرب مثلا او يحطهم فى اوضه ضلمه . 

والناس قالت ان الكائن ده كان بيجى بليل وكان بيحضر بس علشان الاطفال اللى مش بتسمع الكلام اصلا ولا بتنفذ اى اوامر . وكمان الاطفال اللى مكنتش بتروح تنام بدرى او مش بياكلوا الاكل اللى قدامهم او مش بيشربوا اللبن . 

- أمنا الغوله وأبو رجل مسلوخه : 

والاهالى مكنوش بيكتفوا بمعاقبة الاطفال بحكايات ابو رجل مسلوخه وبس ولكنهم كانوا بيقولوا للاطفال ان فيه تعاون مابين الغوله وأبو رجل مسلوخه . وكانوا بيجوا بليل علشان يعاقبوا الاطفال دى . وقالوا عن خطورة أبو رجل مسلوخه انه قادر على تناول الاطفال الصغيرين . 

وانه بيقدر يظهر فى اى وقت من الليل زى مثلا انه ممكن يجيلك من الدولاب او من الشباك او من تحت السرير وكانت حكايته مرعبه جدا او انه بيقدر يطير فى الهوا . وقالوا كمان ان الرجل ده حقود جدا وبيحاول انه يدور على رجلين الاطقال الصغيرين ويقطعها ويركبها لنفسه بدل رجليه المشوهه . 

- حكايات مرعبه : 

والمصرين من وقت قديم جداااا قالوا حكايات مرعبه عن أبو رجل مسلوخه زى مثلا .. ان الاطفال كانوا بيقعدوا تحت اعمدة الكهربا الموجوده فى الشوارع علشان يكتبوا دروسهم . وده لان مصر فى الوقت ده مكنش فيها كهربا لسه بشكل كبير . 

وفى الوقت ده الاطفال سمعوا صوت بنت كانت بتعيط وبتبكى بصوت عالى وبقوه فالاطفال راحوا ناحية صوت البنت دى ولقوها عباره عن عروصه جميله وبتبكى وبتعيط بصوت عالى . فسألها الاطفال عن سبب بكائها ده فقالتلهم انها هتتجوز النهارده وانها مش عايزه تتجوز من العريس ده . 

وبعد كده كان اهل البنت دى بيمشوا بسرعه وراها . واثناء جريهم وراها البنت دى كشفت عن رجلها وكانت رجلين البنت دى مسلوخه زى المعزه بالظبط فالاطفال خافوا جدااا منها وراحوا بشكل مباشر لراجل كان لابس لبس الشرطه وكان شكله غريب قوى برده . 

- ظهور أبو رجل مسلوخه : 

فالاطفال فى الوقت ده قالوا للراجل ده انهم شافوا بنت لابسه لبس عروسه وبتجرى بسرعه واهلها وراها . فقالهم الشرطى وايه الامر العجيب فى كده ؟!! 

فالاطفال قالولوا ان البنت دى كانت رجليها شبه رجلين المعزه وكانت مسلوخه تماما من اللحم . وانها عباره عن عضم وبس . فالشرطى ضحك بصوت عالى سمعه كل الاطفال وبعدها كشف عن رجليه وقالهم : انتوا قصدكم ان رجليها مسلوخه زى دى ؟!!! فالاطفال خافوا جداااا منه ورجعوا بسرعه لبيوتهم وهما خايفين من الحاجات العجيبه اللى شافوها دى . 

- المساليخ الصغار : 

والحكايات القديمه هنا مكنتش بتكتفى انها تردد اسم ابو رجل مسلوخه وبس علشان تخوف الاطفال ولكن كان فيه كمان المساليخ الصغيرين . والمساليخ الصغيرين دول كانوا اولاد أبو رجل مسلوخه وأمنا الغوله وكانت الاطفال دول شكلهم وحش جدا واخلاقهم مش كويسه . 

وكانوا مش بيشربوا غير الدم وبس ومش بياكلوا اى أى حاجه تانيه وكانوا مش بيظهروا الا بليل بس وبيعاقبوا الاطفال اللى بتتبول على السرير والاطفال اللى بتنام لساعات كتيره بدون اى فايده او بيكون صوتهم عالى بدون اى اسباب . 

- التربيه الخطأ : 

ويبقى احنا كده عرفنا ايه هى قصة أبو رجل مسلوخه وأمنا الغوله والمساليخ الصغيرين ولكن طبعا النوعيه دى من القصص عباره عن طرق تربويه كلها خطأ فى خطأ . 

وده لان الاعلان مكنش بتناول قصه زى أبو رجل مسلوخه وحكايات الرعب اللى بتتحكى للاطفال بصوره جديه . الا فى مسلسل يوميات ونيس للفنان محمد صبحى لانه ذكر فيه ان مينفعش نربى الاطفال على الخوف والرعب . ولكن لازم نربيهم بطريقه سليمه وصحيحه تحياتى ليكم . 

لو عندك اى قصه حابب نحكيها فى القناه او الموقع ياريت تشاركنا اسمها فى التعليقات علشان نعمل عنها فيديو وينزل على القناه .. شكرا جزيلا ... 

- لتحميل تطبيقنا سؤال وجواب وزيارة قسم سؤال وجواب قصص وحكايات لقراءة القصص والاستماع اليها فى اى وقت يمكنك الضغط على الرابط التالى وفضلا وليس امرا ادعمنا بتعليق ايجابى وتقييم 5 نجوم :


- للاستماع الى القصه ومشاهدتها على قناتنا سؤال وجواب قصص وحكايات يمكنك مشاهدة الفيديو التالى :


............................................ 

- لاتنسى الاشتراك فى قناتنا على يوتيوب وتفعيل جرس التنبيهات ليصلك المزيد ... 




تعليقات