القائمة الرئيسية

الصفحات

احدث الاخبار

إسطورة النداهه وعلاقتها بالموت والجنون وسحر العيون للى هيقع فى حبها


النداهه تعتبر واحده من الاساطير المصريه المعروفه والمشهوره فى الريف المصرى واللى بتحكى عن ست جميله جدا بتبقى منوره وعينيها حمرا ومشعه نور فى الضلمه بشكل مخيف جدا . وبتلبس فستان ابيض طويل وبتمشى دايما جنب الترع والمصارف وفى الحقول الزراعيه الضلمه وبتلبس سلسله عباره عن تعبانين بياكلوا بعض . وليها صوت ساحر وجميل بتنده بيه على الرجاله وشعرها بيميل للون الاخضر شويه ... 

وبتمشى زى الطياره فارده دراعاتها ومش بتمشى زى الانسان العادى . ومش بتظهر لشخصين مع بعض فى نفس الوقت لكن بتظهر لشخص واحد بس وهو الضحيه وقتها وبتنده النداهه على اسم اى حد بيمشى فى الوقت ده من الليل وبتتجسد فى شكل حد يعرفه او حتى ميعرفوش وبتسحره بعيونها . ولو فضل سليم لتانى يوم يا اما بيتجنن يا اما بيموت . 

وفيه قصه مشهوره على الانترنت عن شخص اسمه الحاج عبد الخالق محمد واللى سنه بيقرب على 90 سنه بيقول فيها : 

" انا شوفت النداهه زمان ووقتها مكنش فى القرى المصريه كهربا وكانت الضلمه فى كل مكان فى البلد من اول دخول المغرب .... وافتكر وقتها انى كنت رايح لفرح لحد من القرايب واتاخرنا هناك ورجعنا فى وقت متأخر بليل .. ووقت رجوعنا كنا معديين جنب ترعه مليانه ميه وكانت ضلمه جدا . 

ففوجئت بصوت واحده ست بتنده عليا من ورايا باسمى فبصيت عليها فلقيت بنت جميله سنها بتاع 20 سنه كده . وكانت قاعده جنب الترعه .. وبرغم ان الجو كان ضلمه جدا الا ان ملامحها كانت واضحه تماما . ولقيت نفسى رايحلها مكان ماهى قاعده قرب الترعه . 

وهنا زوجتى اخدت بالها وصرخت جامد .. وفوقنى وقتها صوت صراخها العالى من حالة التوهان والاستسلام العجيب الغريب اللى انا كنت فيه بسبب النداهه... واللى قالت قبل ماتختفى فى الميه : 

" فى يوم هتكون ليا وضحكت وهى بتسخر وبتقول لزوجتى : انتى انقذتيه منى لكن انا هاخده منك " 

- والقصه التانيه بتحكيها " سالى الاسكندرانى " وبتقول على لسان جدها قصة لقائه مع النداهه قبل 60 سنه من الوقتى وبتحكى وبتقول : 

جدى كان شاب فى الـ 17 من عمره وكان بيعيش فى منطقة الواحه فى الصحراء الغربيه وكان جميل ووسيم .. فشاف فى يوم بنت قاعده جنب الطريق وهى بتعيط ... فراحلها علشان يسألها بتعيطى ليه ... فرفعت البنت عينيها له وكانت جميله جدا .. وكان نص جسمها بشر ونصها التانى من الجان .. 

ولكن جمالها كان اخاذ جدا فمهتمش بشكلها المخيف ... وطلبت منه انه يمشى معاها ... وبالفعل فضلوا مع بعض حوالى ساعه فى الصحراء البعيده وكان وقتها لسانه مربوط ومش قادر يتكلم ونظره كمان كان مسحور ومش قادر يوقف النظر ليها طبعا لانها سحراه . 

والاسطوره فى الغالب بتقول ان النتيجه النهائيه للحاله اللى بيدخلها الشخص واللى هى ... " نده النداهه " اما الجنون او الموت .. وكان الشخص اللى بيتجنن بسببها بيتقال عليه " المندوه " ... وفى الوقت ده كانوا مش بيلجأوا لعلاجه او حتى يروحوا بيه لاى دكتور لانهم بيعتبروه حاله ميؤس منها ... وده نتيجه للجهل والايمان بالخرافات . 

وفى الفتره دى كان فيه تفسير لكتير جدا من حالات الغرق فى الترع والمصارف على انها من فعل النداهه واللى سحرت الناس دى لحد ماوقعتهم فى الميه وغرقتهم .. وفيه البعض من الناس ادعى انه اتجوز النداهه وانه نزل معاها للعالم السفلى تحت الارض .. الا ان الاغلبيه منهم كانوا بيواجهوا مصير الموت فى تانى يوم من ظهورهم ... 

وده لانه كان بيختفى بشكل كلى وبيظهر فجأه بعد كده .. وبيتقال هنا ان سبب وفاته انه تخلى عن النداهه وعن عالمها السفلى وهى علشان كده بتنتقم منه وبتقتله خوفا من انه يكشف اسرار العالم السفلى بتاعها وعلشان كده كان البعض بيموت فى اليوم التانى او بيصاب بالجنون او بيختفى بشكل نهائى . 

وده من الحاجات اللى كانت بتزود الموضوع اثاره وتشويق اكبر لبعض الناس وبيخليهم يبحثوا عن الدجل والشعوذه علشان يدخلوا فى العالم الغريب ده ... وكان الشئ الوحيد اللى بيحمى الناس من مهاجمة النداهه ليهم انهم يذكروا الله سبحانه تعالى من خلال قراءة أيات معينه من القرأن الكريم او انهم يرشوا الملح عليها لحد ماتختفى نهائيا مع تجنب النظر لعيونها علشان متتسحرش . 

والوقتى ايه هو رأيى علماء النفس والاطباء فى اسطورة النداهه ؟ 

العلماء شايفين ان النداهه اللى بتيجى على صورة امرأه جميله ليها صوت عذب وجميل ماهى الا تنفيس عن بعض الرغبات المكبوته لجذب انتباه الناس التانيه حوالينا ... وبيكون التنفيس ده فى صورة هلوسات إراديه او غير اراديه بتعبر عن اهتمام النداهه بيه وانها بتستناه لانها وقعت فى غرامه وحبه . 

ووصف الاطباء كمان اسطورة النداهه على انها مش الوحيده على مر الزمان .. ففى اليابان مثلا موجود اسطورة المرأه ذات الفم المشقوق أو الممزق وفى الخليج العربى اسطورة أم الدويس وغيرهم وغيرهم من الاساطير من النوع ده واللى ساعد الجهل على انتشارها على مر العصور والازمنه . 

وبالنسبه للتفسير العلمى لاسطورة النداهه وغيرها من الاساطير واللى بتعتمد على الحكايات المنقوله واللى ملهاش اى دليل على حقيقة وجودها ... انه مكنش فيه فى الفتره دى اى وسائل اعلام لنقل الاخبار او حتى اذاعتها بين الناس او الترفيه عنهم .. 

ومكنش فيه اى وسائل للاناره الليليه فى الطرق او الحقول الزراعيه .. وعلشان كده كانت القصص دى هى عباره عن الماده الاساسيه والمصدر الوحيد للحكايات والتسليه .. واللى كتير من الناس بتلاقى المتعه والتشويق فيها مع غياب التعليم وانتشار الجهل فى الوقت ده ... 

ودى كانت اهم الامور اللى خلت الشبح المخيف للجميع هو .... النداهه 

وبكده يبقى احنا عرفنا إسطورة النداهه وعلاقتها بالموت والجنون وسحر العيون للى هيقع فى حبها 

- وفى نهاية قصتنا مش هأكد عليك اشترك معانا فى القناه لو لسه جديد واضغط على زر الاعجاب والمشاركه علشان غيرك يستفيد . 

- وياريت لو عندك قصه او حكايه حابب انك تشاركها معانا على القناه اكتبها فى التعليقات علشان ننزلها على القناه والموقع والكل يستفيد منها 

وفى النهايه كالعاده ... سبحانك اللهم وبحمدك أشهد أن لا إله إلا أنت أستغفرك وأتوب اليك ... والسلام عليكم ورحمة الله وبركاته .

- للمشاهده والاستماع لقصة إسطورة النداهه وعلاقتها بالموت والجنون وسحر العيون للى هيقع فى حبها على قناتنا سؤال وجواب قصص وحكايات يمكنك مشاهدة الفيديو التالى والاشتراك فى القناه ليصلك المزيد من القصص الممتعه والشيقه :



- لتحميل تطبيقنا سؤال وجواب وزيارة قسم سؤال وجواب قصص وحكايات لقراءة القصص والاستماع اليها فى اى وقت يمكنك الضغط على الرابط التالى وفضلا وليس امرا ادعمنا بتعليق ايجابى وتقييم 5 نجوم :





........................................... 

- لاتنسى الاشتراك فى قناتنا على يوتيوب وتفعيل جرس التنبيهات ليصلك المزيد ... 



تعليقات