السلعوه عباره عن حيوان غامض كسب شهره كبيره جدا وبنسمع عنه كتير ولكن بنشوفه قليل او مش بنشوفه اصلا والعلماء اكدوا ان هو عباره عن هجين من اكتر من حيوان زى الكلب والذئب والثعلب وكان بداية شهرة السلعوه عند اجدادنا انها عباره عن حيوان خرافى .
- والوقتى ايه هى قصة السلعوه :
كانت بداية ظهور حيوان السلعوه فى بداية الستينات فى شرق القاهره وبعد كده اختفى وظهر تانى فى التسعينات فى صعيد مصر . فى قرية اسمها أرمنت موجوده فى جنوب صعيد مصر . وده من الحاجات اللى عملت رعب كبير جدا فى قلوب الناس وقتها .
خاصة بعد ظهورها فى بعض المناطق داخل جمهورية مصر العربيه واصابتها وقتلها لكتير من الاطفال والكبار . بجانب اختفائها فى الجبال والصحارى والاماكن البعيده الموحشه . والزراعات العاليه زى قصب السكر والذره والاشجار العاليه والكثيفه . زى مزارع فواكه الرمان والتفاح وغيرهم من الاشجار العاليه .
وبدأت السلعوه تظهر وتختفى على فترات ولكن لما بتظهر كانت بتقتل وتصيب كتير من الناس ... وده من الحاجات اللى كانت بتخلى اهل المناطق اللى هى بتظهر فيها بيفرضوا حظر تجوال من نفسهم خوفا على ارواحهم وارواح اولادهم .
والسلعوه ظهرت فى مناطق كتيره فى مصر ومنها منطقة المرج بالقاهره بحوض القصب ومحافظة الشرقيه بقرية الشبراويه ومحافظة أسوان ومنطقة الخليفه بالمقطم وفى محافظة المنيا بقرية تونه الجبل .
وبتظهر كمان كل فتره وفتره ومن سنوات ظهرت فى قرية اولاد سالم بمركز دار السلام بسوهاج وقامت بعض 25 طفل و4 رجاله وتم تحويلهم للمستشفى علشان يتعالجوا وقال اولياء امور الاطفال ان حيوان السلعوه هاجم الاطفال وقام بعضهم واصابتهم بالجروح واتسبب فى قطع اطراف فى اجسامهم .
وقالوا كمان انها هاجمت 18 شخص فى مركز ديروط فى اسيوط واتسببت فى جروح كتيره ليهم وتم نقلهم لتلقى العلاج بالمستشفيات . وده من الحاجات اللى عملت قلق وخوف كبير لناس كتيره وقتها . واخدوا عقار السعار المعروف باسم " سيرم " وخرجوا من المستشفى بعد استقرار حالتهم والاطمئنان عليهم .
لكن المعروف فى عالم الطب البيطرى ان الكلب المصاب بالسعار مش بيتجوز من الكلاب او الذئاب او حتى السلعوه وده لان الحيوان المسعور بيموت فى خلال 14 يوم من اصابته بشكل مباشر .
وطول الفتره دى مش بيمارس اى وظائف حيويه زى انه بياكل او بيشرب او بيتجوز وبيبقى عصبى جدا وكل اللى بيعمله فى الفتره دى انه بيمارس العض والنهش وبس .
ومن المعروف فى الطب البيطرى كمان ان الشراسه بتختلف عن مرض السعار . لان من الممكن ان الكلب يعض لانه شرس ومش بيكون مسعور وقتها .
وده لان السعار مرض من الممكن انه يصيب الكلاب الشرسه او الكلاب الاليفه واللى مسبقش ليها العض قبل كده ومعنى كده ان مش كل كلب شرس بيبقى مسعور .
وقالوا عن شكل السلعوه انها بتشبه الذئب والكلب فى شكلها وعباره عن هجين بينهم وده لانها بتاخد شراسة الذئب وقوة الكلب . وبتتميز بسرعتها وسواد لونها وودانها عامله زى ودن التعالب ورجليها اللى قدام قصيره عن رجليها اللى ورا .
وبتتميز بالذكاء والمكر ومش بتخاف من البشر وليها قدره كبيره على الاختباء والترصد وبتجمع صفات الكلب والذئب والثعلب وابن أوى .
وأحد الاطباء البيطريين اكد ان فى المناطق الصحراويه بيحصل احيانا تزاوج بين الكلاب والذئاب اللى بتعيش فى المناطق دى .
وان التزاوج ده بينتج عنه الحيوان الهجين ده والمعروف باسم السلعوه واللى بيكون شرس جدا واكتر شراسه من الكلاب بمراحل .
وقالوا كمان ان الكلاب من الممكن انها تتزاوج من كائن السلعوه الناتج من تزاوج الكلاب والذئاب وفى النتيجه بيكون ناتج التزاوج ده كلاب شرسه او كلاب عاديه مش شرسه زى السلعوه .
- ولو هنتكلم الوقتى عن امكانية التهجين :
فهنلاقى ان من اعضاء عائلة الكلبيات " الذئب والكلب وابن أوى او المعروف باسم حيوان الكايوتى " وكلها بتمتلك 39 زوج من الكروموزومات . وده اللى بيخليها قادره على التناسل بشكل ناجح ومش بيمنع ده سوى الجغرافيا او اختلاف السلوكيات زى اختلاف التقاليد بين البشر .
وهنلاقى ان فعليا تم التهجين بين الكلب وحيوان ابن أوى قبل كده فى روسيا ... فمثلا تم صنع هجين للاستفاده من حاسة الشم العاليه لحيوان ابن أوى . وتم تسمية الهجين ده باسم كلب سوليموف .
وفى احيان كتيره تم تهجين الذئب او حيوان ابن أوى الذهبى مع الكلب علشان يتم صنع كلب حراسه شرس والموضوع ده لقى نجاح كبير ومطلوب .
- والسؤال المهم هنا : ليه بيهاجم الحيوان الهجين ده الناس ؟
علشان نأجب على السؤال ده لازم نبص على بعض السلوكيات المتوارثه فى كل من الابوين واللى هما حيوان الكلب وحيوان ابن أوى :
1– بالنسبه لسلوكيات الكلب :
معروف عنه انه صديق الانسان الوفى من الاف السنين من الاستئناس وبيملك عدائيه بتفوق عدائية الذئاب وابن أوى . وبيقبل صاحبه كعضو اعلى رتبه فى قطيعه بصوره طبيعيه وبتغيب غريزة الافتراس عند الكلاب المستأنسه .
2– وبالنسبه لسلوكيات ابن أوى :
فده عباره عن حيوان برى والافتراس بيمثل 80% من غذائه . وفى العاده بتكون الحيوانات اللى بيفترسها حيوانات صغيره وحشرات .. وبيترمم كمان على الجيف وبيأكل بعض النباتات وبيقوم بافتراس الماشيه لو الفرصه سمحتله بكده .
وبيتحاشى الانسان ومش بيملك عدائية الكلب وفيه بعض الحالات اللى تم تسجيلها لافتراسه للاطفال .
ونتيجة عملية التهجين لحيوان بيمتلك الصفات الشكليه للكلب وحيوان ابن أوى انه بيكون نحيف وكلبى الشكل وودانه بتكون كبيره زى ابن أوى واهم تفصيل مرعب للحيوان ده وبيرعب ناس كتيره ان المخلوق ده مش بينبح زى الكلب .
وده لان النباح بيحسس بالاطمئنان وبيخلى اللى بيواجه الكلب بيكون على علم انه مخلوق مألوف غير غامض حتى لو كان مسعور . اما بالنسبه لتوارث السلوكيات فهو بسيط جدا بدرجه كبيره .
وبيمتلك الهجين الضار ده عدائية الكلب وغريزة الافتراس مع عدم خوفه من الناس ولكن هو بيشوفهم زى لقمه جميله طعمها حلو بيسيل لعابه عليها .
وبكده فى النهايه يبقى احنا عرفنا السر الغامض ورا حيوان السلعوه وعرفناها على حقيقتها كمخلوق مسكين بيعيش حرب داخليه بين الكلب وابن أوى .
- ياترى ايه رايك فى قصة السلعوه ؟ وياريت لو عندك قصه حابب تشاركها معانا ونرفعها للقناه والموقع اكتب اسمها فى التعليقات هنا فى الموقع او على القناه او اطلبها مننا من خلال زر اتصل بنا اعلى الموقع .. شكرا جزيلا .
- للمشاهده والاستماع لقصة حيوان السلعوه المخلوق الغامض الذى تسبب
فى رعب الملايين من البشر مالم تعرفه عنه من قبل على قناتنا سؤال وجواب قصص
وحكايات يمكنك مشاهدة الفيديو التالى والاشتراك فى القناه ليصلك المزيد من القصص
الممتعه والشيقه :
- لاتنسى الاشتراك فى قناتنا على يوتيوب وتفعيل جرس التنبيهات ليصلك المزيد ...
