في فيديو وشرح النهارده هنعمل مراجعه كامله وفتح علبه لراوتر هواوى الجديد Huawei SuperVector - DN8245V والفرق بينه وبين راوتر ZTE H188A وهنعرف ايه هى مميزاتهم وعيوبهم وايه الخطوات اللى المفروض تعملها علشان تاخد الراوتر وازاى تتعاقد وتقدم على خط ارضى وخدمة انترنت لاول مره من شركة we .
- اولا كده ايه هى طرق طلب التعاقد على الخط الأرضي المنزلي او اللى هو التليفون الارضى :
1 – اما عن طريق فروع WE
2- او الاتصال بخدمة العملاء على 111
3- او تقديم طلب من خلال الموقع الإلكتروني .
- تانى حاجه بقى ايه هى خطوات التقديم على خط ارضى وخدمة انترنت :
1 - كل اللى بتعمله انك بتروح اى فرع من فروع WE وبتقدم طلب للحصول على خط ارضى وخدمة انترنت على نفس الخط .. وبعد كده الموظف بيملى معاك استمارة طلب تعاقد على تليفون ارضى جديد ومعاها صورة من بطاقتك الشخصيه ولازم طبعا تكون ساريه وبيصورها من الجهتين مع مستند الحيازه وده طبعا علشان يتم عمل بحث للامكانيه الفنيه للتعاقد على التليفون الارضى .... وهل فيه مكان ليك فى اقرب بوكس للخطوط الارضيه فى عنوانك اللى انت قدمته ده ولا لا عن طريق فنى من الشركه .. والطلب ده بيكون مقابل 20 جنيه شامله الضريبه ودى الخطوه الاولى ...
بعد كده لو فعلا فيه مكان متوفر بيجيلك رساله على موبايلك تعرف فيها ان فيه مكان متوفر وان فيه امكانيه لتركيب الخط الارضى وبيطلبوا منك تتوجه لاقرب فرع من فروع WE لاستكمال الاجراءات ... لكن لو مفيش مكان ليك فبتوصلك برده رساله يقولوا ليك فيها انه تعذر وجود الامكانيه الفنيه لتركيب الخط الارضى فى الوقت الحالى وبتدخل فى شريحة المتعذرين لحين توفر مكان ليك ... فالحل البديل بقى فى الحاله دى انك لو تعرف حد معرفه ليك او يتوسطلك فى الموضوع ويمشى الامور فممكن الامور تمشى معاك بشكل اسرع شويه .
- الخطوه التانيه بقى لاستكمال الاجراءات لما بتروح تانى للفرع ان يكون معاك الاوراق دى :
1 – اصل البطاقه الشخصيه وتكون ساريه طبعا وصوره منها وموضح فيها نفس عنوان ومكان التركيب .
2 – يكون معاك عقد ملكيه او عقد ايجار عقار او ايصال مرافق زى " الكهرباء – المياه – الغاز " ويكون باسمك لو انت صاحب الخط وصوره منه .... او حد بينوب عنك بموجب توكيل رسمى منك مع صورة البطاقه الشخصيه وصورة عقد الايجار .
- طيب بالنسبه بقى للمصاريف الاجماليه للتقديم والتعاقد على الخط الارضى والانترنت :
الخط الارضى لوحده 150 جنيه غير شامله الدمغه والضريبه عباره عن اشتراك 3 شهور مدفوعين مقدما لباقة we ارضى 20 بالاضافه كمان لخدمة اظهار رقم الطالب واللى بتقدر تلغيها بعدين لو مش عايزها ... والدمغات عباره عن 8 جنيه + 2.90 جنيه لكل ورقه والضريبه طبعا 14% .. اما بالنسبه للانترنت والراوتر فبتدفع 270 جنيه للاشتراك في الخدمه مع الحصول على الراوتر ..... يعنى انا دفعت الاجمالى كله 440 جنيه بالخط الارضى والانترنت ودى تجربتى انا الشخصيه ...... وبعدها بيوم بالظبط بيوصلك رسايل على موبايلك بيعرفوك فيها ان تم تفعيل خدمة الانترنت على خطك وبيبعتولك رساله فيها اسم المستخدم وكلمة السر لخدمة الانترنت الخاصه بخطك واللى هنعرف ازاى نغيرها في الراوتر ان شاء الله .. وبعد ما الرساله الاخير هدى بتوصلك بتتوجه لاى فرع تستلم منهم الراوتر بتاعك بس يكون معاك اصل البطاقه لانك بتستلم الراوتر باصل البطاقه مش بالصوره .
- والوقتى تعالوا بينا بقى نعمل فتح علبه ونعرف اكتر عن روترات WE الاخيره واللى هى راوتر هواوى وراوتر ZTE :
بالنسبه بقى للراوتر فروترات We الجديده معروفه باسم Super Vectoring AC-1200 او الروترات فائقة التوجيه Super Vector والرقم اللى بيكون موجود بعد AC أو AX بيمثل الحد الأقصى للنطاق الترددي النظري للراوتر يعنى لو قلنا 1200 دى معناها 1200 ميجابت في الثانية و 1900 معناه 1900 ميجابت في الثانية و 3200 معناها 3200 ميجابت في الثانية وهكذا .
والراوتر اللى معانا ده راوتر من نوع هواوى والموديل بتاعه Huawei SuperVector - DN8245V ولكن امكانياته هى هى نفس امكانيات الراوتر الاخير من WE واللى نوعه ZTE Super Vectoring ZXHN- H188A بس طبعا ده من شركة هواوى ولكن التانى من شركة ZTE وهى برده شركه صينيه لها اسمها من زمان ولكن طبعا هواوى اشهرهم واقواهم فى مجال الاتصالات عموما
وسواء راوتر هواوى او راوتر ZTE فهى عباره عن روترات جديده من شركة WE والراوتر ده جاى بديل لراوتر tplink vdsl وبيدعم السرعات العاليه من خلال انه بيقدم تكنولوجيا متقدمه جدا فى المجال اللاسلكى والحمايه وبيمكن المستخدمين من الوصول لسرعات عاليه بتوصل لـ 200 ميجابت فى الثانيه .
ولذلك نصيحتى ليك .. لو رحت الفرع لاستلام الراوتر اسال عن راوتر هواوى الاول لو موجود خده ولو مش موجود فراوتر ZTE كويس برده مفيش فيه مشكله ولكن اللى لاحظته فى راوتر ZTE انه بيسخن شويه عن الهواوى واكيد ده هيأثر عليه مع الوقت ....
وبالنسبه للفرق بين المداخل ولمبات الاضاءه فاللى موجود هنا موجود هنا باختلاف التصميم والشكل والترتيب بس . يعنى مثلا هتلاقى على راوتر هواوى موجود لمبات اضاءة لمداخل الـ LAN فى وش الرواتر لكن فى راوتر ZTE مش موجودين وموجود مكانهم لمبات 2.4 GHZ و 5 GHZ ولمبه لمدخل USB وهتلاقى كمان ان لمبات الاضاءه فى راوتر هواوى اما شغاله او طافيه لكن فى راوتر ZTE لو فيه مشكله بتنور احمر ولو مفيش مشكله فشغاله باللون الاخضر عادى .. هتلاقى ان زرار الباور فى هواوى فى الجنب من تحت لكن فى ZTE فى ضهر الراوتر ... هتلاقى كمان ان مفتاح زرار خاصية WPS هو وزرار الــ WIFI موجودين فى ضهر راوتر ZTE لكن فى راوتر هواوى موجودين مع بعض فى زرار واحد للتبديل بين الخاصيتين .... هتلاقى كمان ان مخارج الـ LAN فى ضهر الراوتر الهواوى عباره عن 5 مخارج بس فيهم مخرج لونه ازرق وده بتستخدمه لو عايز تخلى الرواتر يبقى مقوى اشاره او Access point .. ولكن فى راوتر ZTE موجود نفس المخرج بس باللون الاصفر زى باقى المخارج مع الكتابه عليه باللون الاخضر لتوضيح وظيفته ومهمته . ودى كانت اهم الفروق بين راوتر هواوى DN8245V وراوتر H188A ZTE .
- تعالوا بينا بقى الوقتى نتكلم عن اهم مميزات راوتر هواوى اللى معانا والراوتر التانى ZTE :
1- ان الراوتر بيدعم السرعات العاليه للانترنت واللى بتوصل لـ 200 ميجابت فى الثانيه الواحده .
2 – والراوتركمان بيدعم ترددين واللى هما تردد 2.4 جيجاهرتز واللى بتوصل لـ 300 ميجا بت في الثانيه الواحده .. و 5 جيجاهرتز واللى بتوصل لـ 867 ميجا بت في الثانيه الواحده .. وبالتالى هتاخد سرعات عاليه وقت الاتصال على الـwifi ..... ولو متعرفش ايه الفرق بين الـ 2.4جيجاهرتز والـ 5 جيجاهرتز فالـ 2.4 جيجاهرتز بيعطى تغطيه اوسع واكبر ولكن الـ data rate او معدل نقل البيانات بتاعته قليله .. ولكن الـ 5 جيجاهرتز بيعطى تغطيه اقل واصغر ولكن الـ data rate او معدل نقل البيانات بتاعته اكبر واعلى .
3 – الراوتركمان بيدعم عدد مستخدمين لشبكة الواى فاى بيوصل لـ 64 جهاز في نفس الوقت وده هيفيدك طبعا في المستقبل او حتى حاليا لان في العاده بتلاقيك موصل اجهزه كتيره جدا على نفس الشبكه عن طريق الواى فاى زى مثلا شاشه سمارت او غساله الى اخره بقى من اجهزه ذكيه وكده .
4 – هتلاقى كمان وهتلاحظ استقرار لاسلكى اكتر وتغطيه لاسلكيه اوسع واكبر ... ودى كانت اهم المميزات للراوترين
- طيب ايه هى اهم العيوب سواء في راوتر هواوى DN8245V وراوتر H188A ZTE :
- راوتر هواوى بطئ بشكل مش ملحوظ قوى وقت التنقل بين القوائم داخل الراوتر .. وتحس كمان ان السوفت وير بتاعه معقد شويه .
- بالنسبه لرواتر ZTE بيسخن شويه والسوفت وير بتاعه حديث وجميل ولكن تحس انك شغال على راوتر من الروترات القديمه فى شكل ترتيب القوائم وكده ولكنها اسهل فى التعامل من راوتر هواوى .... ودى كانت العيوب فى الراوترين
- والوقتى بقى ايه هى شروط الحصول على راوتر WE الجديد Super Vectoring AC-1200 سواء الهواوى او الـ ZTE ؟
1- مبدئيا كده الراوتر ده متاح للعملاء الجدد والعملاء الحاليين بس ... ولكن مش متاح للعملاء اللى معاهم الراوتر القديم بنظام الايجار اللى هو يعنى " مقابل الاستخدام " الا طبعا في حالة انك مالك للراوتر وشاريه كاش مش مأجره .
2 – العميل طبعا له الحق انه ياخد راوتر واحد بنظام الايجار مقابل 10 جنيه شهريا + 14% ضريبه يعنى هتدفع 11.40 جنيه كل شهر على فاتورة اشتراك خدمة الانترنت يعنى في السنه 136 جنيه لايجار الراوتر بس .. يعنى في 5 سنين تكون انتهيت من تسديد سعر الراوتر واصبحت مالك للراوتر لانك هتكون سددت 680 جنيه يعنى قول الـ 700 جنيه
3 – العميل كمان له الحق انه ياخد 2 راوتر وده في حالة انه دفع المبلغ كاش نقديا واللى هو 614 جنيه + 14% ضريبه يعنى الاجمالى 700 جنيه
4 – بالنسبه للضمان فالجهاز عليه ضمان سنه من تاريخ استلام الجهاز فى حالة انك اشتريته كاش نقديا ... ولكن فى حالة انك اخدت الراوتر بنظام الايجار الشهرى فبيكون الراوتر على مسؤوليه الشركة ضد عيوب الصناعه من يوم امتلاكك للراوتر كعميل والضمان بيكون سارى من يوم استلامك للراوتر ....
ودى كانت اهم المعلومات عن كيفية التقديم على خط ارضى وخدمة انترنت وعرفنا ايه الفرق بين راوتر هواوى وراوتر ZTE وكل شئ عنهم بالتفصيل وطبعا هسيبلك رابط خدمات الخطوط الارضيه والروترات على موقع المصريه للاتصالات تحت الفيديو فى الوصف وفأول تعليق مثبت خاص بموضوع الفيديو على موقعنا الالكترونى ان شاء الله علشان لو حابب تعرف معلومات عنهم اكتر .
- والوقتى بقى تعالوا بينا في الفيديو اللى تحت نعرف ازاى نوصل الراوتر بخط التليفون الارضى ونشغله لاول مره ونعرف ازاى نغير كلمة سر الدخول لاعدادات الراوتر ... وازاى كمان نغير اسم الشبكه وكلمة السر واخفاء الشبكه اوايقافها نهائيا وازاى نحميها من خلال الغاء تفعيل خاصية wps او المعروفه باسم Wi-Fi Protected Setup .... يعنى " اعداد الاتصال المحمي " ...
- ما سيتم شرحه في الشرح العملى على الكمبيوتر :
1- الدخول لاول مره
2- تغيير كلمة سر الدخول للراوتر
3- تغيير اسم المستخدم وكلمة السر اللى الشركه بعتتهم فى رساله
4- تغيير اسم الشبكه وكلمة السر وكيفية اخفاء الشبكه او ايقافها نهائيا
5- الغاء خاصية wps
وللعلم بالشئ الروترات الوقتى بقت بتشتغل بشكل مباشر على طول بمجرد توصيلها بالخط الارضى مش بتحتاج منك انك تعملها configuration او ضبط اعدادات لاول مره زى زمان وكده ... ولكن كل اللى مطلوب منك انك تغير كلمة سر الدخول لاعدادات الراوتر وتغير اسم شبكتك وكلمة السر وتعمل اخفاء للشبكه او حتى توقفها نهائيا اوتحميها من خلال الغاء تفعيل خاصية wps اللى قلتلك عليها الوقتى ... لو حابب كده طبعا علشان الحمايه
- للانتقال الى خدمات الخطوط الارضيه ومعرفة تفاصيل اكتر على موقع WE المصريه للاتصالات يمكنك زيارة الرابط التالى :
- للتعرف اكتر على روترات المصريه للاتصالات WE المتوفره حاليا ومعرفة المزيد من الامكانيات والمميزات يمكنك زيارة الرابط التالى :
- لمشاهدة فيديو راوتر we الجديد هواوى Huawei SuperVector DN8245V بمميزات وامكانيات جباره هو ولا ZTE ؟ | مراجعه شامله يمكنك مشاهدة الفيديو التالى :
