القائمة الرئيسية

الصفحات

احدث الاخبار

سماعات جيروم الاصليه والتقليد وتجربة سماعة JoyRoom Jr-T03s بخاصية TWS وشرح خاصية ANC


سماعات airpods من الاجهزه اللى مفيش حد فينا حاليا بيقدر يستغنى عنها وده لانك تقدر تستخدمها فى اى وقت واى مكان وانت سايق وانت قاعد وانت نايم وانت بتجرى وده لانها طبعا wireless وبالتالى انت بتقدر تتحرك بكل سهوله من غير بقى تعقيدات الاسلاك والكلام ده كله وعلشان كده النهارده عملت ليكم مراجعه كامله عن سماعة جيروم joyroom t03s والفرق بينها وبين الاصدار اللى بعدها واللى هو الـ pro وازاى نعرف الاصلى من التقليد وايه الفرق بين خاصية TWS و ANC وازاى نعرف ان كانت السماعه عازله للضوضاء او لا كل ده واكتر هنعرفه فى الموضوع ده والفيديو فى نهاية الموضوع على قناتنا على يوتيوب والوقتى يالا بينا نتعرف على مميزات ومواصفات وعيوب وسعر وكيفية استخدام السماعه الـ joyroom t03s .
- اولا فتح العلبه :
العلبه فيها خمس ملحقات :
1- السماعات والباور بانك
2- الجراب السيليكون للحمايه
3- حامل للسماعات والجراب
4 – وصلة شاحن من النوع " لايتينينج - lightening " زى بتاع الايفون
5 – دليل التشغيل او الاستخدام باللغه الانجليزيه والصينيه وبس

- ثانيا المميزات التقنيه والفنيه والمواصفات للسماعات :
- بالنسبه لحجم السماعة والبوكس او الكيس او الباور بانك بتاعها فهو فيه شبه كبير ومطابق لحجم سماعة أبل الاصلية airpods .
- بالنسبه لجودة الصوت فهى عاليه واستيريو وجميله جدا .
- بتدعم الشحن اللاسلكي .
- بتدعم سيري للايفون .
- إصدار البلوتوث فيها هو الاصدار الخامس .
- التحكم فيها باللمس .. يعنى اثناء المكالمه لمسه واحده سريعه تفتح مكالمه ولمسه زيها تفصل مكالمه .. ولو عايز تكنسل على حد بيتصل عليك فبتضغط ضغطه اطول شويه لمدة ثانيه فتكنسل على اللى بيتصل عليك ..... اما بالنسبه بقى للوسائط فلو هتشغل او توقف مقطع فيديو او صوت شغال فبيكون بلمسه واحده سريعه ولو ضغطت مرتين ورا بعض من السماعه اليمين بيروح للمقطع اللى بعده ولو ضغطت من السماعه الشمال مرتين بيروح للمقطع اللى كان شغال ..... ولو ضغطت 3 مرات ورا بعض بيظهرلك مؤشر الصوت للسماعات على الموبايل او الكمبيوتر ولو عايز تعلى الصوت فى نفس وقت ظهور مؤشر الصوت فبتضغط بعد كده 3 مرات ورا بعض بسرعه من السماعه اليمين بيعلى الصوت ولو ضغطت 3 مرات ورا بعض من السماعه الشمال بيهدى الصوت .... ده بالنسبه لكيفية تشغيلها والتحكم فى ضوابط اللمس بتاعتها واللى هى controls touch .
- موجود فيها كمان حساس او مستشعر للودن بمجرد ماتحطها فى ودنك بتشتغل تلقائى طالما متصله بالموبايل ولما تشيلها من ودانك بتفصل تلقائى .
- وبتعمل اقتران تلقائي بالموبايل بمجرد إخراجها من علبة الشحن او بنقول عليه popover pairs يعنى مش محتاج كل مره تستخدم فيها السماعه تربطها من جديد او تعمل بحث عنها .
- بتقدر تستخدم كل سماعه لوحدها لو حابب كده سواء بقى للاتصالات او للوسائط زى الصوت والفيديو والالعاب وكده وتقدر تستخدم كل سماعه استعمال متواصل لمدة ثلاث ساعات ونص .
- نطاق الاتصال بتاعها : أقل من أو ما يعادل 10 متر لانها شغاله بتقنية البلوتوث الاصدار الخامس طبعا .
- فيها كمان خاصية TWS اختصار لـ True Wireless Stereo او خاصية تصحيح الصوت اللاسلكى واللى بتخلى كل سماعه من السماعتين مفصوله عن التانيه وده من خلال اتصالها بالبلوتوث في حالة انك مشغل كل سماعه لوحدها .. لكن لو السماعتين قريبين من بعض ومشغلهم في نفس الوقت فالسماعه اليمين والشمال هتعمل حاجه اسمها التبديل الى وضع الاستيريو مزدوج القناه وده في النهايه بيوفرلك جودة صوت فوق الممتازه للسماعتين مع بعض .. ولكن ده طبعا بيخليهم يخصلوا بطاريه بسرعه فدايما لو هتشغل السماعتين مع بعض اتاكد انهم مشحونين كويس قبلها .

- بالنسبه بقى للبطاريات والشحن :
- سعة بطارية علبة الشحن او الكيس او الباور بانك : 400 مللي أمبير في الساعة يعنى تقدر تشحن السماعات 4 مرات فى كل مره الكيس او الباور بانك مشحون فيه 100 % .
- سعة بطارية السماعة الواحده : 45 مللي أمبير في الساعة .
- مدة تشغيل الموسيقى : 3 ساعات .
- مدة المكالمات بتوصل الى : 3 ساعات ونص .
- وقت الاستعداد بدون استخدام : 80 ساعة .
- مدة شحن علبة الشحن عن طريق الشحن اللاسلكي : 3 ساعات .
- مدة شحن علبة الشحن عن طريق كابل usb : ساعة
- فيها كمان ميزة ظهور نسبة شحن بطارية الكيس او الباور بانك بتاعها والسماعات على انظمة ios على الايفون لكن بالنسبه للويندوز والاندرويد فبيظهرلك نسبة شحن السماعات بس .
- يتم شحن الكيس او باور بانك السماعات بوصلة ايفون " لايتينينج - lightening " او لاسلكيا .
- وبالنسبه لاضاءة الشحن وقت الشحن بتكون باللون البرتقالى ولما بتخلص شحن فلون لمبة الشحن فى الكيس بيتحول للون الاخضر المستمر لمدة دقيقه وبعدين بيطفى .. وهكذا نفس الموضوع للشحن اللاسلكى برده .

- بالنسبه للعيوب :
- وهى انك مبتقدرش تربطها على اكترمن جهاز فى وقت واحد يعنى بتربطها على جهاز واحد وبس بعكس السماعات المشهوره والاصليه للماركات الكبيره زى الجابرا توك 15 اللى اتكلمت عنها قبل كده .. واللى كنت بتقدر تربطها على اكتر من 8 اجهزه فى نفس الوقت .. ولكن طبعا بالنسبه لسعرها وامكانياتها دى فهى ممتازه جدا .
- مفيش فيها خاصية عزل الضوضاء واللى معروفه باسم ANC ولكن لو عايز خاصية عزل الضوضاء تقدر تروح للاصدار الاعلى منها واللى هى joyroom t03s pro ومنها برده اصدارين اصدار بخاصية TWS اللى سبق وذكرناها فوق واصدار فيه عزل ضوضاء وهتلاقى ده موضح على العلبه من بره زى ماهو موضح قدامك في الصوره كده وبيكون مكتوب على العلبه ANC يعنى اختصارا لـ Active Noise Cancelling او اللى هو الغاء الضوضاء المحيطه او النشط .

- كيفية عمل اعادة ضبط مصنع للسماعات لاعادتها لوضعها الافتراضى :
- كل اللى هتعمله انك هترجع السماعات في الكيس او الباور بانك وهتضغط على الزرار اللى في ضهر الكيس او باور بانك السماعات لمدة ثوانى لحد ماينور ويطفى اكتر من مره وبكده السماعات رجعت لوضع المصنع الافتراضى بتاعها لو فيها اى مشكله زى عدم الاقتران او ان سماعه شغاله والتانيه لا تقدر انك تعالج المشكله دى من خلال عمل اعادة ضبط مصنع للسماعات بالطريق دى ... وطبعا فيه انواع تانيه بتضغط على الحساسات او الازرار اللى موجوده في جوانب السماعات مع بعض في نفس الوقت لمدة ثوانى وهترجع برده السماعات لوضعها الافتراضى .

- بالنسبه للالوان المتوفره منها :
الابيض والاسود والذهبى والفضى

- بالنسبه للسعر :

سعر الاصدار اللى معانا واللى هو : joyroom jr-t03s بيكون مابين 500 الى 550 جنيه مصرى يعنى بالدولار تقريبا 32 دولار امريكى . اما بالنسبه لسعر الاصدار التانى واللى هو joyroom jr-t03s pro فسعر السماعه بيكون مابين 600 اللى 650 جنيه مصرى يعنى بالدولار 41 دولار امريكى . والى هنا نكون قد انتهينا نتمنى لكم الفائده دائما معنا .

- لمشاهدة فيديو ومراجعة سماعات جيروم الاصليه والتقليد وتجربة سماعة JoyRoom Jr-T03s بخاصية TWS وشرح خاصية ANC على قناتنا على يوتيوب يمكنك مشاهدة الفيديو التالى :


.........................................  
 
- لاتنسى الاشتراك فى قناتنا على يوتيوب وتفعيل جرس التنبيهات ليصلك المزيد ...


تعليقات